ROXAS CITY – Presuhan ang ginsudlan sang duha ka mga indibidwal matapos nadakpan sang kapulisan nga nagalapas sa curfew hour sa banwa sang President Roxas, Capiz.
Ginkilala ang mga salawayon nga mga persona nga sanday Ricky Villanueva Jr., kag Jaypee Enorme lunsay mga residente sang Barangay Vizcaya, President Roxas, Capiz.
Sa impormasyon nga nakuha sang Bombo Radyo sa President Roxas PNP nagaguwa nga yara pa sa impluwensiya sang makahulubog nga ilimnon ang duha ka nahinambitan nga mga persona sang makit-an sang kapulisan nga nagalagaw sa pihak nga ginapatuman na ang curfew hour.
Sa pihak nga bahin, ginsulod sa karsel sang President Roxas PNP ang isa ka lalaki nga nagtuga sang kinagamo kag eskandalo sa Vizcaya Ville, sang amo nga banwa.
Nagakitkit na sa rehas sang karsel si Armando Gimoto matapos gindakup sang kapulisan bangud sa pagtuga sini sang kinagamo sa amo nga lugar.
