Yara na sa kustodiya sasng mga kapulisan sang duwa ka mga indibidwal nga ginakabig nga “missing links” sa kaso sang mga nagkaladula nga mga manugbulang, suno kay Philippine National Police (PNP) spokesperson Police Brigadier General Jean Fajardo.
Ginkilala sang PNP ang duwa bilang mga utod sang isa sa mga akusado kag whistleblower nga si Julie “Dondon” Patidongan. Suno kay Fajardo, nadakpan ang mga ini sa isa ka pungsod sa Southeast Asia kag ginbiyahe pabalik sa Pilipinas sang Hulyo 22.
Isa sa ila ang ginapahayag nakit-an sa CCTV samtang naga-withdraw sang kwarta gamit ang ATM card sang isa sa mga nadula nga manugbulang. Samtang ang isa nakwaan man sang video nga kaupod ang isa pa ka biktima sa ginapahayag nga kidnapping.
Gin-aresto ang isa sa bisa sang warrant of arrest bangud sa kaso nga robbery, samtang ang isa naman ang bangud sa paggamit sang iban nga pangalan sa iya nga pasaporte.
Ginsiling sang PNP nga lehitimo ang pagka-aresto sa duwa bangud ginpatigayon ini sa koordinasyon sang Bureau of Immigration.
Nahibaluan nga naglab-ot sa 34 ka mga manugbulang ang nareport nga nagkaladula sang 2021 tubtob 2022. Suno sa pulisya, posible nga ginpang-kidnap ang mga ini bangud sa isyu sang game-fixing ukon pagpangdaya sa bulang.
Ginpahayag ni Patidongan nga ang mga biktima ang ginaalegar ginpang-lubong sa Taal Lake.
Gintudlo man sini ang negosyante nga si Atong Ang bilang isa sa mga utak sa likod sang krimen kag gindalahig man ang aktres nga si Gretchen Barretto sa diin lunsay ini nila ginpanginwala ang amo nga pagpanimangod.
