ROXAS CITY – Wala nakapalagyo ang duha ka mga miyembro sang ginapatihan Budol Budol gang matapos nadakpan sang task force crusader sa syudad sang Roxas.
Nakahunong sa karon sa Roxas City PNP sanday Jonas Costona 19-anyos kag Mark Anthony Garcia 21-anyos.
Una nga nabiktima sang mga suspek ang nagabaligya sang cellphone sa isa ka mall sa San Roque extension.
Apang posible nga wala nakuntento sa nakuha nga kuwarta, lnagkadto sa isa ka establisemento sa Roxas Avenue para liwat makapang-biktima.
Malas lamang sang mga suspek bangud namutikan sang cashier ang modus operandi sang nasambit nga grupo kag gilayon nga nagpangayo sang rsponde sa security guard.
Natabuan naman nga yara sa palibot ang pila ka mga katapu sang task force crusader nga nangin kaupod sang mga security guard sa paglagas sa mga suspek nga hinali nagdalagan kag nagsakay sa ila getaway vehicle matapos ginkumpirma sang una nila nga nangin biktima.
Antes nasarado sang mga suspek ang pirtahan sang salakyan, nauyatan na ini sang isa ka miyembro sang task force crusader rason nga wala nakapalagyo ang duha.
Gin-ako pa nanday Costona kag Garcia nga ila lamang nahimo ini bangud wala sila sang kuwarta sa pagpadulong sa Boracay.
Samtang nakapalagyo ang duha ka mga mag upod sang suspek sakay ang ila nga getaway vehicle.
