SIGMA, CAPIZ – Duha ka separado nga insidente sang pagpangawat ang nagluntad sa banwa sang Sigma, Capiz.
Una diri, nagparekord sa Sigma Municipal Police Station ang isa ka 40-anyos nga inspector sang bus matapos nga nabugtawan na lamang sini nga nahukas na ang duha ka panid sang jalousie sang ila bintana kag bukas na ang pirtahan sang ila balay sa Barangay Poblacion Sur, Sigma, Capiz.
Sandig sa ginpabalhag ni Jessie Crisosto 40-anyos, sa iya pagbugtaw iya natukiban nga wala na ang pila ka mga kagamitan kalakip na diri ang iya mga cellphone kag wallet nga may unod nga kwarta nga nagalab-ot sa kapin P1,200.
Ginapatihan nga gintaban sang wala matumod nga kawatan ang nasambit nga mga kagamitan rason nga ginpakamaayo na lamang sini nga iparekord sa pulisya ang insidente.
Magluwas diri, nagpabalhag man si Rosemarie Elvira, 35-anyos matapos nga ginaalegar gintaban sang wala matumod nga mga kawatan ang iya laptop nga nagabalor sang P18,000, kwarta nga P2,000 kag pila ka mga kagamitan sa ila balay sa Barangay Dayhagon, Sigma, Capiz.
Ginapahayag nga ginbuksan sang mga kawatan ang ila nga sliding door kag gintaban ang nasambit nga mga kagamitan.
Padayon naman ang imbestigasyon sang mga kapulisan agud matumod ang mga responsable sa nasambit nga insidente.
Ginapatihan naman sang mga otoridad nga posible isa ka grupo lamang sang mga kawatan ang nagapangawat sa nasambit nga banwa.
