ROXAS CITY – Nagapabilin kag nagpaligad sang gab-i ang 21 ka mga persona nga ginapahayag iligal nga nagdungka sa bahin sang Barangay Cogon, Roxas City apang ini ang natalana nga igadul-ong pabalik sa Balud, Masbate subong nga adlaw.
Sa interview sang Bombo Radyo Roxas kay CGPO2 Quelin Palmaira, sang Coastguard Culasi, ginpahayag sini nga nahapunan sang hinulat ang 21 ka mga persona sa covered gym sang nasambit nga barangay kag ila ini ginsugat agud i-tranfer sa ila nga istasyon.
Dugang pa diri nga nagkoordinar na sila sa Calumpang Masbate coastguard station para sa nagakaigo nga violations nga posible pagaatubangon sang mga persona nga imbolbado sa illegal entry.
Mahibaluan nga sa probinsya sang Iloilo kuntani ang destinasyon sang mga ini agud magbaligya sang ila skin care products.
Matandaan nga suno kay Barangay Kagawad Pastor Aguilos, ginpahayag sini nga nadiparahan niya ang sakayan nga nagdungka sa ila baybayon sakay ang 21 ka mga persona.
Sa iya pag-usisa sa mga pasahero, ginsiling man nila nga wala sila makahibalo nga indi sila sa port magadungka bangud nag-arkila lang ang mga ini sang sakayan.
Gilayon naman nga ginpalab-ot sang opisyal sa pinuno sang City Disaster Risk Reduction and Management Office (CDRRMO) kag nagpakig-angut naman ang ahensya sa mga katapo sang PCG-Capiz.
