JAMINDAN, CAPIZ – Yara na sa maayo nga kahimtangan ang 22 ka mga estudyante kag isa ka manunudlo nga nalipong sa sulod sang Jamindan National High School matapos nagsalangisag kag ginkulbaan sa natabo nga pagsumbaganay sang duha ka mga estudyante.
Sa interview sang Bombo Radyo kay Municipal Administrator Mac Arthur Valdemar, iya ginpahayag nga samtang nagatambong ini sang programa sa gymnasium, natingala sila nga may yara sang ambulansya nga nagaabot sa nasambit nga eskwelahan.
Base sa panaysayon sang ila nga una nga napamangkotan, nagguwa ang impormasyon nga may yara sang binun-anay nga natabo nga posible amo man ang rason sang pagsalangisag sang mga kabataan kag manunudlo.
Suno sa iya, sandig sa imbestigasyon sang Jamindan Municipal Police Station, nagsumbaganay ang 16 anyos kag 14 anyos nga estudyante kag wala nagbun-anay.
Apang ang 16 anyos nga estudyante ang may yara sang dala nga kutsilyo nga na-recover sang gwardya kag wala na nagamit pa sa insidente.
Dugang pa sang natungdan, may yara sang ginhatag nga metal detector ang local government unit sang Jamindan sa apat ka mga dalagko nga mga secondary schools kag ini ang ginagamit sang mga gwardya.
Nagapanawagan si Valdemar sa publiko nga likawan ang pag-share kag pag-post sang sala nga impormasyon tuhoy sa insidente.
