ROXAS CITY – Patay ang 24-anyos nga lalaki, matapos nga nag-utas sang kaugalingon nga kabuhi sa Barangay Dayhagan, Pilar, Capiz, sang Abril 1.
Ang indi na pag hingadlan nga biktima ang isa ka mangingisda sa amu nga barangay.
Sandig sa imbestigasyon ni PCpl. Jaypee Tomogda sang Pilar MPS, nga nag-inom-inom pa ang biktima kaupod ang iya mga abyan sang Biyernes sang gab-i, apang nagsulod ini sa ila balay.
Sa amu man nga gab-i, nasapwan ini sang iya live-in partner nga gin-utas na ang kaugalingon sini nga kabuhi, gani gindali-dali sang mga ini nga madala sa ospital sa Balasan, Iloilo.
Apang alas-11 sa aga, kahapon sang Sabado, Abril 2, gindeklarar ini sang doktor nga patay.
Sa dugang nga imbestigasyon sang kapulisan, nahibaluan nga nagtuyo na sadto nga mag-utas sang kabuhi ang nasambit nga biktima.
