Nakabaton sang tig-₱200,000 nga pinansyal nga ayuda ang 26 ka barangay sa banwa sang Mambusao sa idalom sang Bawat Barangay Makikinabang Program (BBMP) sang administrasyon ni Presidente Ferdinand “Bongbong” Marcos Jr.
Ginturn-over ang mga tseke sang Agosto 11, 2026 sa Hall of Governors, sa pagpanguna ni Capiz Governor Fredenil H. Castro, kaupod si Ex-Officio Board Member kag Liga ng mga Barangay-Capiz President Nico Yap.
Sa idalom sang programa, ang ₱200,000 nga ayuda sa kada barangay ginbahin sa duha ka bahin. ₱100,000 ang para sa scholarship ukon educational assistance sang mga kwalipikado nga college students, samtang ang nabilin nga ₱100,000 gamiton para sa mga proyekto kag serbisyo sang barangay.
Lakip sa mga nakabenepisyo ang mga barangay sang Atiplo, Balat-an, Balit, Batiano, Bating, Bato Bato, Baye, Bergante, Bunga, Bula, Bungsi, Burias, Caidquid, Cala-agus, Libo-o, Manibad, Maralag, Najus-an, Pangpang Norte, Pangpang Sur, Pinay, Poblacion Proper, Poblacion Tabuc, Sinondojan, Tugas, kag Tumalalud.
Ang BBMP isa sa mga programa sang national government nga nagahatag sang direkta nga pinansyal nga suporta sa mga barangay agud masuportahan ang edukasyon, serbisyo publiko, kag mga proyekto nga makahatag benepisyo sa komunidad.
