JAMINDAN, CAPIZ – Natalana nga ipaidalum sa autopsy examination ang bangkay sang 27-anyos nga mangunguma matapos nga nasapwan-patay sa kilid sang suba sa Barangay San Juan, Jamindan, Capiz.
Ginkilala ang biktima nga si Eric Valaquio, 27-anyos, residente sang nasambit nga lugar.
Ginpahayag sang imbestigador nga si Police Staff Sergeant Lou Robles nga nagaguwa sa imbestigasyon sang Jamindan Municipal Police Station nga posible ginluthang ang biktima matapos nakit-an nga may pilas igu ini sang bala sa iya nga liog.
Nakabaton sang pagpanawag ang kapulisan gikan kay Maximo Florentino nga amo ang nakasapo sa biktima.
Ginapahayag nga sang Hunyo pa ginaayam sang mga kapulisan si Valaquio bangud suspek ini sa paglabu-patay.
Sadtong Hulyo 4 ginapahayag nga nagpanawag pa si Valaquio sa iya iloy kag naghambal nga mapauli siya sa ila balay para magkaon apang wala man ini nagsapol.
Sa karon, padayon nga ginapadalman sang pulisya ang ila imbestigasyon agud matumod ang suspek nga posible nagluthang kay Valaquio.
