Naglab-ot na sa apat ka mga barangay sa Binalbagan, Negros Occidental ang apektado sang pagtagas sang molasses nga ginapahayag naghalin sa sugar mill.
Suno kay Binalbagan Mayor Alejandro Mirasol, lakip sa sini nga mga barangay amo ang San Juan, Canmoros, Marina, kag bisan ang Progreso.
Gin-athag sang City Environment and Natural Resources Office (CENRO)-Kabankalan Supervising Environment Management nga nag-evaporate ang pond-type nga stockpile sang molasses sa Binalbagan-Isabela Sugar Company bangud sa tuman kainit nga panahon nga naglab-ot sa 43°C.
Base sa datos, tubtob sa 4,890 ka tonelada sang molasses ang yara sa pond-type stockpile samtang mga 2,400 ka tonelada sini ang nabilin pagkatapos sang pagtulo.
Matapos ang insidente, gilayon nga ginkuha sang kompaniya ang nagtulo nga molasses apang napaslawan ini nga mapunggan nga maglapta ini sa suba.
May kaso man sang fish kill sa barangay Canmoros nga isa sa mga lugar nga apektado sang leak.
Bilang sabat, may mga sandbag nga ginbutang sa suba agud malikawan ang paglapta sini samtang ginpanugyanan man ang kompaniya nga magbutang sang bio enzymes agud mabuhinan ang mabaho sa suba.
Nahibaluan nga ang molasses isa ka sahi sang waste agricultural product kag makahalalit sa ikaayong lawas kun kaunon sa madamo nga amount.
Ginatun-an naman sang Pollution Adjudication Board kun mahimo mahatagan sang penalidad ang nasambit nga kompaniya bangud sa natabo nga insidente.
