ROXAS CITY – Pilason ang apat ka mga kalalakinhan nga ginalakipan sang tatlo ka mga driver sang motorsiklo kag isa ka backrider matapos nagkarambola ang tatlo ka mga motorsiklo sa Barangay Culasi, Roxas City.
Nag-angkon sang pilas sa lawas sanday Roger Develos, security guard sang Pilar, Barotac Viejo, Iloilo, Ronald Desidro kaupod ang utod nga backrider nga si Vicmar Desidro mga residente sang Barangay Dinginan kag Reymark Buñag sang Sityo Ilaya, Barangay Dinginan, Roxas City.
Sa imbestigasyon sang Roxas City PNP nagaguwa nga padulong ang sekyu nga si Develos sa Barangay Culasi sakay sa iya motorsiklo sang hinali ginside swipe sang motorsiklo nga ginamaneho ni Buñag nga yara sa impluwensiya sang makahulubog nga ilimnon.
Bangud sa impact sang pagkabunggo nagdiretso ini sa motorsiklo sang mag-utod nga Desidro.
Gilayon nga nagresponde ang Capiz Emergency Response Team sa ginluntaran sang insedente kag gindapatan sang pagbulong ang mga biktima antes gindala sa ospital.
