Naglab-ot na sa 40 ka mga lugar sa Pilipinas ang ginpaidalom sa state of calamity (SOC) bangud sa paglaslas sang nagligad nga bagyo Crising kag sa karon nga mga bagyo Dante, Emong kag sang habagat.
Base sa datos nagikan sa National Disaster Risk Reduction and Management Council (NDRRMC), kalakip sa mga nasa state of calamity ang 23 ka siyudad kag munisipalidad sa probinsya sang Cavite kag 17 ka lugar sa Metro Manila kag iban pa nga mga probinsiya .
Sa monitoring sang ahensiya, kalakip sa napaidalom sa state of calamity ang mga banwa sang Mangaldan kag Umingan sa Pangasinan, Meycauayan, Paombong, Balagtas kag Calumpit sa Bulacan, Masantol sa Pampanga, Paniqui sa Tarlac, Agoncillo sa Batangas, San Mateo, Rodriguez (Montalban) kag Cainta sa Rizal, Roxas sa Palawan, Barbaza kag Sebaste sa Antique, kag sa Metro Manila man, ang Malabon City kag Quezon City.
Magluwas diri, ginpaidalom naman ang pila pa ka siyudad sa Metro Manila kasubong sang Marikina, Manila kag Las Piñas samtang sa iban pa nga mga probinsiya sa Ilocos Region kasubong sang Pangasinan, kun sa diin pila ka mga lugar diri ang naka-eksperyensya man sang malapnagon nga pagbaha ang ginpaidalom naman sa State of Calamaity kalakip Dagupan City, Calasiao, Lingayen, Malasiqui kag Sta. Barbara subong man sa may Cebu City.
Sa karon, apektado na sang mga kalamidad ang masobra 2.7 milyon ka mga indibidwal nagikan sa masobra 700,000 nga pamilya sa bug-os nga rehiyon sa pungsod magluwas sa Eastern Visayas.
Sa kabilugan nga numero, masobra 147,000 ka mga indibidwal nagikan sa kapin 40,000 ka pamilya ang nagapabilin sa mga evacuation centers samtang ang masobra 90,000 ka mga indibidwal gikan sa kapin 23,000 ka pamilya ang temporaryo nga nagapasilong sa iban nga mga lugar.
Naka-eksperyensya ang mga nasambit nga lugar sang mga insidente sang pagbaha, pag-collapse sang duta kag istruktura, kag buhawi.
Pinakamalala nga ginlaslas nga rehiyon ang Central Luzon nga ginsundan sang Negros Island region kag CALABARZON.
Nagpatay na sang 12 ka mga indibidwal ang na-ekperyensyahan nga kalamidan sa pungsod samtang walo pa ang nagapabilin nga missing kag walo man ang nareport nga pilason.
