Yara sa peligro nga masuspinde ang 40 ka planta sang kuryente bangod sa kakulang sang aksyon tunga sang padayon nga manipis nga suplay sang kuryente sa rehiyon, suno kay Energy Secretary Sharon Garin.
Kon madumduman, una na nga nag-isyu ang Department of Energy ukon DOE sang 203 ka show-cause order sa mga power generation company sa bug-os nga pungsod sang Hulyo bangod sa ila kapalpakan sa pagsumiter sang mandatory self-assessment report. Katuyuan sini nga mamonitor ang abilidad sang mga planta nga mag-operate sang husto, lakip na ang mga outage.
Suno sa kalihim, naghatag na sang warning ang kagawaran sa mga power generation company kag yara na sila sa proseso sang pagrekomendar sang suspensyon nga ipadala sa Energy Regulatory Commission ukon ERC.
Wala ginpahayag sang kalihim ang mga operator nga posible masuspinde, apang suno sa iya, lakip sa listahan ang mga gagmay nga diesel power plant.
Madugay na nga nagaatubang sang problema sa suplay sang kuryente ang rehiyon sang Visayas. Halos adlaw-adlaw ini nagasaka sa yellow alert, kag sa pila ka tion nagadangat pa sa red alert kon indi nagabastante ang suplay agod matubag ang kinahanglanon sang kuryente sa rehiyon.
