Pila ka mga bagyo ang nagapamahog kag ginalauman nga magasulod sa Philippine Area of Responsibility (PAR) subong nga ‘ber’ Months.
Suno sa state weather bureau, 9 ka mga bagyo ang ginalauman nga magasulod sa pungsod antes magtakop ang tuig.
Ini ang may kaangtanan sa La Niña Alert nga gin-anunsyo sang state weather bureau kun sa diin ginalauman ang 70% ukon kapin pa nga tsansa sang La Niña formation subong nga bulan humalin Oktubre tubtub Disyembre kag mahimo magpadayon tubtob Pebrero 2026.
Suno sa Deputy Administrator sang state weather bureau nga si Marcelino Villafuertee, ang posible nga ika-16 nga bagyo pagatawgon nga “Paolo” kag tubtob sa 5 tubtub 9 ka dugang nga tropical cyclones ang magasulod sa PAR tubtub sa katapusan sang tuig 2025.
Apisar nga wala ginalauman nga magbaskog pa ang mga bagyo nga magaabot kun ikumparar sa nauna nga mga bagyo, ginapreparar sa gihapon ang pagsulod sini agud malikawan ang mas dako nga epekto nga mahimo sini matuga.
Samtang, nagpahanumdom naman si Villafuerte sa publiko nga dapat pirme maghanda ilabi na sa Visayas kag Mindanao bangud ini ang mga lugar nga posible maigo sang ginapaabot nga mga bagyo.
