ROXAS CITY – Napasakaan na sang kaso nga paglapas sa RA 9165 ukon “Comprehensive Dangerous Drugs Act of 2002” ang 6 nga mga persona nga nadakpan sang Philippine Drug Enforcement Agency (PDEA) – Capiz sa ginkasa nga drug buybust operation sa Sitio Tunga, Barangay Tanque sini nga syudad.
Matandaan nga nadakpan ang mag-utod nga Wynel Benlero Arcangeles, 51-anyos, Wally Benlero Arcangeles, 38-anyos kag apat pa ka kaupdanan nga sanday John Acepcion, 25-anyos sang Brgy. Jumaguicjic, kag ginatudlo nagadul-ong sang iligal nga droga, Wyndel Arcangeles, 41-anyos paka-isa sang mag-utod nga Arcangeles kag ang duha nga naabtan sa hulot nga ginaalegar nagagamit sang iligal nga droga nga sanday Rone Baral 41-anyos sang Brgy. Lawaan, kag Korina Mantac 20-anyos sang Brgy. Milibili, nga ginpahayag nagpadulong sa lugar agud mag-utang sang kwarta para sa inugbakal gatas sang 4-ka bulan nga bata.
Nahibaluan nga nakuha sa ila posesyon ang 22 tanan ka sachets sang iligal nga droga, nga nagabug-at sang 20 gramos kag ginapahayag may market value nga P140,000.
Ginpaidalum sa drug test ang mga arestado kag lunsay nagpositibo ang mga ini.
Sa karon, nagapabilin nga yara sa kustodiya sang PDEA-Capiz ang mga arestado para sa nagakaigo nga disposisyon.
