ROXAS CITY, CAPIZ – Magadala sang nagkalain-lain nga epekto sa sektor sang agrikultura kag sa mga kunsumidor ang 60-ka adlaw nga temporaryo ban sang rice importation sa pungsod suno sa presidente sang Rice Retailers Association sa Roxas City.
Sa interview sang Bombo Radyo Roxas kay Mr. Edilberto Cambe, Presidente sang Roxas City Rice Retailers Association, iya ginpahayag nga positibo ang epekto sini para sa mga mangunguma.
Suno kay Cambe, pinaagi sa pag-ban sang imported nga bugas, mas daku ang tsansa nga mabaligya sang mga mangunguma ang ila humay sa mas patas kag maayo nga presyo nga indi magresulta sa kapirdihan sa negosyo.
Apang gin-ako man ni Cambe nga may yara sang posible nga negatibo nga epekto ini sa bahin sang mga manugbaligya kag kunsumidor. Tungod sa limitado nga supply sang bugas, posible nga magsaka ang presyo sini nga mahimo magdulot sang kabudlayan sa mga konsumidor.
Panawagan niya nga kuntani maintindihan sang publiko ang sitwasyon bangud ini ang resulta sang ginapatuman nga polisa sang gobyerno.
Sa bahin sang mga programa sang gobyerno pareho sang “Benteng Bigas, Meron Na”, ginpahayag ni Cambe nga limitado ang epekto kag ikasarang sini sa paghatag sang malawig nga solusyon. Suno sa iya, kinahanglan ang mas epektibo nga sistema sa pagpresyo sang bugas nga makabenepisyo sa tanan, halin sa mangunguma tubtob sa konsumidor kag indi mag-apekto sa supply.
Ginalauman nga maga-epekto ang nasambit nga temporary ban sumugod Setyembre 1, 2025.
– With an interview from Bombo Roadnie Daban Dalanon
