CAPIZ-Nakabaton sang tig-₱2,325 nga bulig pinansyal ang 708 ka mangunguma kag mangingisda halin sa anum ka kabanwahanan sa Segundo Distrito sang Capiz paagi sa Presidential Assistance for Farmers and Fisherfolks Program (PAFFP). Gintigayon ang pagpanagtag sang ayuda sa Dao Civic Center sang Oktubre 8, 2026.
Sa kabug-usan, 214 ka benepisyaryo ang halin sa Dao, 140 sa Cuartero, 45 sa Ivisan, 174 sa Jamindan, 31 sa Sapian kag 104 sa Tapaz. Ginapaabot nga ang ayuda makabulig sa ila mga kinahanglanon sa pangabuhian kag makapahagan-hagan sa adlaw-adlaw nga galastuhan sang ila mga panimalay.
Ang PAFFP isa ka programa sang gobyerno nasyonal nga nagatinguha nga makahatag sang bulig sa mga mangunguma kag mangingisda, nga nagaatubang sang nagataas nga presyo sang mga kinahanglanon kag nagkalain-lain nga hagit sa pangabuhian.
Ginasuportahan sang administrasyon ni Capiz Governor Fredenil H. Castro ang mga programa nga nagahatag sang bulig sa sektor sang agrikultura kag pangisdaan, nga kabahin sang mga prayoridad para sa kaayuhan sang mga Capisnon.
Nagtambong man sa aktibidad sanday Dao Mayor Jimbo Barruela, Provincial Economic Development and Investment Promotion Office (PEDIPO) Head Rio Garcia, Engr. Israel Barros kag mga representante sang Department of Agriculture–Region VI, upod ang mga kapitan sang nagkalain-lain nga barangay sa nasambit nga mga banwa.
