ROXAS CITY -99 porsyento sang mga motorista sa probinisya sang Capiz ang nagapamatuk sa motorcycle barrier nga natalana ipatuman sa mga mga motorista sang pungsod agud malikawan ang paglapta sang Coronavirus Disease ukon COVID-19.
Ini ang ginpahayag ni Chap Rider Russel Monton Ban, Presidente sang Capiz Brother Hood Rider sang mainterview sang Bombo Radyo.
Ginpahayag ni Ban nga wala sang logic sa pagbutang sang barrier sa mga naga-angkas nga mag-asawa kag maghimata kun isa man lang ka balay ang ila ginapulian.
Dugang pa ni Ban nga magluwas nga indi komportable sa mga motorista ang barrier, dako ang posibilidad nga makatuga pa ini sang aksidente sa mga motorista sa tion nga paliron ini sang hangin.
Ginpahayag man ni Ban nga wala anay ginkonsulta sang mga natungdan ang mga motorista natuhoy sa mga epekto sini antes ginpatuman ang nasambit nga barrier.
Samtang ginkompirmar man ni Ban nga ginkasugtan naman sang mga motorista sa isla sang Panay nga magpadala sang sulat sa National Inter Agency Task Force ukon NIATF nga nagapamatuk sa pagbutang sang nasambit nga barrier.
Ginsuhestiyon man ni Ban nga magluwas sa motorista nakadapat man nga sekyaron ang social distancing sa sulod sang mga salakyan.
