Nagsulat sang bag-o nga kasaysayan si Ace Ar B. Dapat, tumandok sang Barangay Sublangon, Pontevedra, Capiz, matapos madinalag-on nga nasaka sini ang summit sang Island Peak sa Nepal nga may kataason nga 6,189 meters above sea level.
Sa interview sang Bombo Radyo kay Dapat, ginpaambit sini ang iya eksperyensya sa ekspedisyon sa Nepal, nga naghatag sa iya sang oportunidad nga makab-ot ang isa ka importante nga kadalag-an sa iya mountaineering journey.
Nag-abot si Dapat sa Kathmandu City sadtong Setyembre 22, 2026, kag sang Setyembre 27, nagpadulong ini sa Lukla Airport, nga amo ang nangin suguran sang iya ekspedisyon sa kabukiran sang Nepal.
Sang Oktubre 4, 2026, nalab-ot ni Dapat ang Everest Base Camp nga may kataason nga 5,364 meters above sea level, antes nagpadayon sa mas mataas nga bahin sang iya ekspedisyon.
Sang Oktubre 9, 2026, nangin madinalag-on ang iya pagsaka sa summit sang Island Peak, nga may kataason nga 6,189 meters above sea level, kag nagmarka sang isa ka importante nga kadalag-an para sa mga mountaineer sa Capiz.
Ang iya nahimo nga kasaysayan nagapakita sang determinasyon kag kaisog sang mga Capiznon sa pag-atubang sang mga pagtilaw apisar pa sa pagsaka sang mataas nga bukid, samtang nagahatag man ini sang dungog sa iya lugar nga ginhalinan.
