Nakarekord sang 100% passing rate ang West Visayas State University (WVSU) La Paz Campus sa October 2026 Chemists and Chemical Technicians Licensure Examination.
Sa interview sang Bombo Radyo kay Dr. Joselito Villaruz, presidente sang WVSU, iya ginpahayag nga isa sa mga rason sa likod sang amo nga kadalag-an amo ang suporta sang administrasyon sang unibersidad sa mga estudyante, paagi sa paghatag sang good learning environment, kaupod ang paggiya sang mga matutom nga manunudlo kag staff.
Suno kay Villaruz, nagapakita ang amo nga resulta sang ila padayon nga pagpaninguha nga mahatagan ang mga estudyante sang kalidad nga edukasyon kag kinahanglanon nga suporta agud makab-ot nila ang ila tagsa ka mga handum.
Nahibaluan nga nakakuha man sang ikatlo nga pwesto ang University of the Philippines Visayas (UPV) sa Iloilo City, nga nakarekord sang 92.86% passing rate sa amo man nga pasinawan.
