Magahimo sang legal nga aksyon ang gobyerno sang Australia batok sa Facebook, TikTok kag iban pa nga dalagku nga digital platforms bangud sa ginapatihan nga indi pagtuman sa social media ban para sa mga menor de edad nga wala pa sang 16 anyos.
Suno kay Bombo Denmark Suede, International correspondent sa Australia, natalana ang gobyerno nga magsaka sang kaso batok sa mga kompanya nga ginapatihan wala nagtuman sa nasambit nga layi.
Base sa online safety regulator sang Australia nga eSafety Commissioner, gin-imbestigaran na halin pa sang Marso ang Facebook kag Instagram nga pareho ginapanag-iyahan sang Meta Platforms, pati na ang TikTok, Snapchat kag YouTube, bangud sa posibilidad nga wala nila natuman ang mga pagsulundan sang layi.
Dugang pa sang natungdan, kabahin ini sang tikang sang gobyerno sang Australia agud maprotektahan ang mga kabataan batok sa makahalalit nga mga content kag iban pa nga peligro sa internet.
