Ginkilala ang probinsya sang Capiz bilang Best Program for Culture and Arts kag magkuha sang 1st Runner-Up nga pagkilala sa kategorya nga Best Tourism-Oriented Local Government Unit sa ika-27 nga ATOP-DOT Pearl Awards.
Sa interview sang Bombo Radyo kay Rophine Gregorio Visorio, Acting Head sang Provincial Tourism and Cultural Affairs Office (PTCAO), iya ginpahayag ang importansya sang amo nga pagkilala sa padayon nga pagpapalig-on sang turismo, kultura kag mga tradisyon sang probinsya.
Suno kay Visorio, ang pagkilala nagapakita sang mga tikang kag programa nga ginapatuman sang probinsya agud mapreserbar ang lokal nga kultura kag sining, samtang ginapalapad ang oportunidad nga mapakilala ang Capiz bilang isa ka tourist destination.
Nagalaum man ang natungdan nga paagi sa padayon nga pagpakig-angot sang nagkalain-lain nga sektor, mas mapabaskog pa ang turismo sang Capiz kag mas madamo nga bisita ang ma-engganyo nga magbisita, magkilala kag mag-apresyar sang manggaranon nga kultura, tradisyon kag mga atraksyon sang probinsya.
