Nagpahanumdom ang isa ka health expert sa publiko nga indi lamang pisikal nga panglawason ang dapat hatagan sang importansya, kundi lakip man ang mental health sang isa ka tawo.
Sa interview sang Bombo Radyo kay Dr. Leah Florence Adricula-Sicad, psychiatrist sang Roxas Memorial Provincial Hospital, iya ginpahayag sa pagpangabuhi sang isa ka tawo, nagadamo nga kabudlayan kag pagpamigos nga mahimo maeksperyensyahan sini.
Suno kay Sicad, importante nga mahangpan sang publiko nga may daku nga epekto ang mental health sa pag-atubang sang mga problema, paghimo sang mga desisyon, kag pagpakig-angot sa iban nga tawo.
Pahayag pa sini, ang temprano nga ihibalo sang mga palatandaan sang problema sa mental health ang mas may mahapos tion sa paghatag sang nagakaigo nga pag-atipan.
Lakip sa mga dapat hatagan sang atensyon amo ang padayon nga pagbag-o sa balatyagon, pagkabudlay sa pagtulog, kag kabudlayan sa pagtuman sang adlaw-adlaw nga responsibilidad, ilabi na kon nagapadayon ini kag nagadugang ang epekto sa kabuhi sang isa ka tawo.
Dugang pa sang natungdan, indi magkahadlok sa pagpangayo sang bulig sa mental health professionals kon ang mga kabudlayan nagapadayon ukon nagasugod na makaapekto sa kahimtangan kag pag-obra sang isa ka tawo.
