Indi makuntento ang Bagong Alyansang Makabayan (BAYAN)-Panay sa ginalauman nga P40 tubtob P50 nga wage increase para sa mga mamumugon sa Western Visayas kag padayon nga ginaduso ang P250 nga dugang sa minimum wage sang mga trabahador sa pribado nga sektor.
Sa interview sang Bombo Radyo kay Elmer Forro, Secretary General sang Bayan-Panay, iya ginpahayag nga indi na bastante ang minimum wage nga P550 kada adlaw bangod sa padayon nga pagsaka sang presyo sang mga nagapanguna nga kinahanglanon, serbisyo kag pamasahe.
Suno kay Forro, kinahanglan ang mas mataas nga sweldo agud masarangan sang mga mamumugon ang nagadugang nga adlaw-adlaw nga galastuhon, ilabi na sa tunga sang pagsaka sang inflation kag pagnubo sang purchasing power sang piso.
Nagalaum man ang natungdan nga pamatian ang ila nga mga panawagan para sa pagpahagan-hagan sang pagpangabuhi sang mga mamumugon.
