Ginhingyo ni Palace Press Officer Usec. Claire Castro si Senator Ronald Bato dela Rosa nga boluntaryo nga mag-surrender kag respetuhon ang kasuguan.
Mabaskog nga ginpanindugan sang Malacañang nga padayon nga lagson sang mga otoridad si dela Rosa kon indi ini boluntaryo nga magsungka sa sulod sang gintalana nga deadline sang gobyerno.
Suno kay Castro, katuyuan sang ginhatag nga extension nga mahatagan sang kahigayunan ang senador nga magsungka sang malinong kag boluntaryo nga magkooperar sa mga otoridad.
Dugang pa ni Castro, bilang isa ka anay katapo sang Philippine National Police kag subong Isa ka senador, dapat si Dela Rosa ang una nga magpakita sang respeto kag magtuman sa kasuguan.
Ginpahayag man ni Castro nga indi dapat mangin inspirasyon si Dela Rosa sa iban nga indibidwal nga nagapangatubang sang arrest warrant nga magpanago sa baylo nga mag-atubang sa legal nga proseso.
Sa subong, nagapabilin nga nagapanawagan ang Malacañang sa boluntaryo nga pagsungka sang senador agud malikawan ang mas istrikto nga tikang sang mga otoridad.
