Wala pa sang nabaton ang Philippine National Police (PNP) nga pauna nga senyales ukon pagpahayag sang intensyon nga magsurender halin kay Senator Ronald “Bato” Dela Rosa.
Suno kay PNP spokesperson Police Colonel Allen Rae, wala pa sang bisan ano nga senyales sang pagsurender sang senador, bisan pa nga ginhatagan na siya sang mga otoridad sang isa ka semana nga palugit.
Dugang pa sang PNP, ini na ang tion para untatan ni Bato ang iya pagpanago kag magsurender sang malinong kag may dignidad.
Nagpadugang na ang pamunuan sang PNP sang mga tracker team agud matul-id ang ginapahamtangan ni Dela Rosa.
Apang, mas ginapili gihapon sang mga otoridad nga magsurender siya sang husto agud malikawan ang bisan ano nga kinagamo ukon insidente.
Madumdoman nga ginpahibalo sa publiko nga may balor nga ₱50 milyon nga pabuya para sa makahatag sang impormasyon sa pagkadiskubre sang ginapahamtangan ni Senator Dela Rosa.
Samtang, suno sa Department of the Interior and Local Government (DILG), ginaprotektahan suno si Bato sang isa ka armado nga grupo sa Mindanao.
Ginapangita subong si Dela Rosa sang International Criminal Court (ICC) may kaangtanan sa kaso nga crimes against humanity nga may kaangtanan sa kampanya kontra droga sang anay Presidente Rodrigo Duterte.
Gin-akusahan ang senador nga isa sa mga kaupod nga responsable sa ginapahayag nga mga krimen sa amo nga kaso.
