ROXAS CITY – Magapatuman sang nagkalain-lain nga traffic schemes ang City Mayor’s Office (CMO) kag Traffic Management Unit (TMU) sang Roxas City halin Oktubre 29 tubtob Nobyembre 2, agud masiguro ang hapsay nga pagdalagan sang trapiko sa tion sang Undas.
Sa palibot sang Banica Cemeteries, magapatuman sang one-way traffic sa McKinley kag Magallanes Streets halin Aguinaldo Street pakadto Ellieta Street, lakip ang pila ka bahin sang Ellieta, Burgos, Bangbang kag Legaspi Streets.
May mga gintalana man nga no-entry points, parking areas kag no-parking zones agud malikawan ang pagginutok sang mga salakyan.
Sa Loctugan Cemetery, magapatuman sang one-way traffic sa duha ka nagakonektar nga barangay roads pakadto sa sementeryo.
Gintalana ang parking sa wala nga bahin sang dalan pakadto sa sementeryo kag sa duha ka kilid sang highway malapit diri. Samtang, ginadilian ang pagparada sa tuo nga bahin sang dalan pakadto sa sementeryo kag sa duha ka kilid sang mga dalan nga sakop sang one-way traffic scheme.
Samtang, sa Mt. Zion Memorial Park kag St. Lourdes Memorial Park, ginadilian ang pagparada sa duha ka kilid sang mga dalan sa sulod sang 100 meters halin sa mga sementeryo.
May kaangay man nga no-parking restriction sa Brgy. Cagay Cemetery, kun sa diin ginadilian ang pagparada sa duha ka kilid sang mga dalan sa sulod sang 100 meters halin sa sementeryo.
Sa interview sang Bombo Radyo Roxas kay TMU Head Gonzalo Andrada, ginpahayag niya nga ginpatuman ang mga traffic scheme agud mapahapos ang pagbiyahe sang publiko nga magaduaw sa ila mga hinigugma nga nagtaliwan na.
Ginapanawagan ni Andrada ang mga motorista nga sundon ang mga traffic sign kag instruksiyon sang mga traffic enforcer, likawan ang pagparada sa mga lugar nga ginadilian, kag indi magsupak sa one-way traffic scheme ukon mag-counterflow agud malikawan ang mga aksidente kag pagginutok sang trapiko.
Ginapangabay sang TMU ang kooperasyon kag disiplina sang tanan nga motorista agud mangin hapsay kag malinong ang pagduaw sang publiko sa ila mga hinigugma sa tion sang Undas.
