Nagapadayon ang pagpanghanda sa Banica Cemetery sa Roxas City sa pagpanguna sa nagahilapit nga pagsaulog sang tigkalalag.
Nagabulig man ang pila ka organisasyon kag mga boluntaryo sa pagpaninlo sang palibot sang sementeryo agud masiguro ang kahinlo sini antes ang pag-abot sang mas madamo nga bisita.
Sa interview sang Bombo Radyo kay Maria Alma Agudo, caretaker kag vendor sang kandila, iya ginpahayag nga mas matinlo na sa karon ang palibot sang sementeryo bangud sa pagbuligay sang mga boluntaryo.
Suno kay Agudo, nagasugod na halin sang Lunes ang pag-abot sang mga tawo nga nagakadto agud panglimpyohan ang lulubngan sang ila mga pinalangga nga nagtaliwan na.
Pahayag pa sini, mas madamo pa ang magakadto sa sementeryo sa Sabado kag sa masunod nga mga adlaw samtang nagahilapit ang pagsaulog sang tigkalalag.
Nagpanawagan man ang natungdan sa tanan nga mangin responsable sa mga gamit kag pagkaon nga dal on sa sulod sang patyo kag ihaboy ang basura sa tama nga basurahan.
