Simbahang katolika, nagpahanumdom sang matuod nga kahulugan sang undas 2026

Nagpahanumdom ang Simbahang Katolika sa publiko parte sa matuod nga kahulugan sang pagsaulog sang Undas 2026.

Sa interview sang Bombo Radyo kay Rev. Fr. Jose Arturo Emilio Arbatin, Spokesperson sang Archdiocese of Capiz, iya ginpahayag nga ang Undas indi lamang tion sang pagbisita sa mga himata kundi panahon man sang pagpangamuyo, paghimo sang maayo nga buhat kag paghalad sang sakripisyo para sa mga kalag.

Suno kay Arbatin, importante nga padayon nga dumdumon ang aton mga himata nga nagtaliwan na paagi sa pagpangamuyo, ilabi na sa paghalad sang Santos nga Misa.

Dugang pa sini, paagi sa aton pagpangamuyo, nagapangabay kita sa Ginoo nga buligan ang mga kalag nga makaangkon ang kabuhi nga dayon kag kahimayaan sa langit.