Magadeploy ang Police Regional Office (PRO) 6 sang masobra 5,000 ka mga pulis agud masiguro ang seguridad kag mamintinar ang katawhay sa bug-os nga Western Visayas bilang pagdumdom sang tigkalalag.
Sa interview sang Bombo Radyo kay Police Major Lailyn Sencil, spokesperson sang PRO-6, iya ginpahayag nga kabahin ini sang ila preparasyon agud mapasiguro ang seguridad sang publiko, partikular sa mga sementeryo, simbahan, terminal kag iban pa nga matawo nga lugar.
Suno kay Sencil, ipatuman man sang kapulisan ang dugang nga police visibility kag deployment sa mga lugar nga ginalauman nga magagutok sa mga nagabiyahe kag pamilya nga nagabisita sa ila nagtaliwan nga mga pinalangg
Magluwas diri, magakoordinar man ang PRO-6 sa iban pa nga ahensya sang gobyerno kag lokal nga panguluhan agud masiguro ang matawhay kag luwas nga pagdumdom sang Undas.
Nagpahanumdom man ang natungdan sa mga magabisita sa sementeryo nga bantayan ang ila mga personal nga gamit, likawan ang pagdala sang dalagko nga kantidad sang kwarta kag indi pagbayaan ang ila mga kabataan nga wala sang nagabantay agud malikawan ang ila pagkadula ukon pagbulagay.
