Nag-expire na ang isa ka semana nga ultimatum sang Philippine National Police (PNP) kay Senador Ronald “Bato” dela Rosa nga boluntaryo nga magsungka sa mga otoridad.
Natapos ang extension nga ginhatag sang National Police sang Biyernes, Oktubre 30, matapos ginhatagan sang isa ka semana ang senador halin Oktubre 23.
Madumduman nga, kadungan sang paghatag sang ultimatum, gin-anunsyo man ni Department of the Interior and Local Government (DILG) Secretary Jonvic Remulla ang paghatag sang 50 milyon pesos nga padya sa sin-o man nga makahatag sang impormasyon nga magatudlo sa nahamtangan sang senador.
Sa pihak sini, wala pa nakit-an ukon nadakpan si Dela Rosa sa subong.
Samtang, ginpanindugan naman sang abogado sang senador nga may gamhanan nga protector ang iya kliyente.
Ginklaro ni Israelito Torreon, legal counsel ni Dela Rosa nga indi tawo kundi ang Dios ang ginatumod sini nga protector.
Suno sa iya, ang iya kliyente may daku nga pagtuo kag nagapangamuyo.
Apang ginahulat pa ang aksyon sang Korte Suprema sa hingyo ni Dela Rosa nga balabagan ang implementasyon sang arrest warrant nga ginpaguwa sang International Criminal Court (ICC).
