Nagresulta sang kinagamo kag pagpangawat sa mga balaligyaan ang hublag-protesta sang mga pamatan-on sa Germany pagkatapos nga linibo ka mga demonstrador ang nagtipon sa 34 ka mga syudad agud ipanawagan ang mas maayo nga edukasyon, mas manubo nga gasto sa pagpangabuhi kag pagpamatok sa mandatory military service.
Ang “Gen Z regelt” nga grupo ang nagpanguna sa mga protesta sa mga mayor nga syudad lakip na ang Berlin, Frankfurt kag Munich sini nga Sabado. Katuyuan man sang hublag nga ma-engganyo ang gobyerno nga dugangan ang pondo para sa edukasyon kag serbisyo sa ikaayong lawas.
Sa Frankfurt, indi magnubo sa duha ka balaligyaan ang ginkawatan samtang pila pa ka mga establisemento ang nahalitan matapos nangin bayolente ang demonstrasyon.
Suno sa kapulisan, wasak man ang mga bintana sang pila ka mga balaligyaan kag ginhabuyan sang Molotov cocktails ang mga emergency responders.
May sunog man sa pila ka mga barikada sa Hamburg, samtang ang pila ka mga negosyo nagsirado sang temprano kag nagbutang sang proteksyon sa ila mga bintana bangud sa kahadlok nga maglala ang kinagamo.
Suno sa mga organizers, lakip sa nagapanguna nga reklamo sang mga pamatan-on amo ang nagataas nga gasto, kakulang sang suporta sa edukasyon kag plano nga ipatuman ang compulsory military service.
Samtang, nagpaandam naman ang mga otoridad nga basi pahimuslan sang mga extremist groups ang protesta agud maghimo sang kinagamo.
