Ginpaathag sang isa ka constitutional law expert ang importansya sang papel sang defense team ni Vice President Sara Duterte sa paghatag sang klaro kag igo nga pagpaathag tuhoy sa mga alegasyon sang unexplained wealth nga ginapangatubang sini.
Sa interview sang Bombo Radyo kay Atty. Joenar Pueblo, President sang Philippine Arbitration Center in the Visayas, iya ginpahayag nga may importante nga papel ang defense sa pag-atubang sa mga alegasyon, bangud amo ini ang oportunidad sang kampo sang akusado nga sabton kag kontrahon ang mga ebidensya nga ginpresentar batok sa iya.
Suno kay Pueblo, kinahanglan nga mahatagan sang nagakaigo nga pagpaathag ang mga dokumento kag financial records nga ginapresentar sa impeachment trial, ilabi na ang mga bank records, tax declarations, Statement of Assets, Liabilities and Net Worth ukon SALN, kag iban pa nga rekord nga may kaangtanan sa ginapahayag nga manggad sang Bise Presidente.
Samtang, ginalauman nga magabalik ang impeachment trial sa Nobyembre 9, matapos nga temporaryo nga ginpauntat ang proceedings kasunod sang desisyon sang prosecution nga indi na pagpadayonon ang tatlo ka impeachment articles kag magatutok na lamang sa Article II nga may kaangtanan sa unexplained wealth.
