Nagapanawagan ang isa ka health expert sa publiko nga pili-on kag konsumuhon ang mga pagkaon nga may dugang nga importante nga nutrients agud malikawan ang nagkalain-lain nga problema sa ikaayong lawas bangud sang kakulang sa bitamina kag mineral sa lawas.
Sa interview sang Bombo Radyo kay Ruth C. Tupaz, Nutritionist-Dietitian II sang Bailan District Hospital, kasunod sang pagsaulog sang National Food Fortification Day sa Nobyembre 7.
Suno kay Tupaz, ang food fortification amo ang proseso sang pagdugang sang importante nga nutrients ukon sustansya sa mga pagkaon agud madugangan ang nutritional value sini kag matabangan nga mapunggan ang micronutrient deficiencies ukon kakulang sang importante nga bitamina kag mineral sa lawas.
Pahayag pa sini, ang micronutrients amo ang mga bitamina kag mineral nga kinahanglan sang lawas sa gamay nga kadamuon apang importante sa normal nga pag-obra sini.
Lakip diri ang Vitamin A, iron kag iodine nga may importante nga papel sa pagmintinar sang maayo nga panan-aw, paghimo sang pula nga mga selula sang dugo kag pag-uswag sang utok kag lawas.
Dugang pa sang natungdan, ang food fortification indi lamang responsibilidad sang mga food manufacturers kundi nagakinahanglan man sang suporta sang tagsa ka pamilya paagi sa pagpili sang masustansya kag luwas nga pagkaon para sa mas maayo nga ikaayong lawas.
