Dako nga bulig sa adlaw-adlaw nga pagpangabuhi sang mga mangingisda sa Capiz ang Presidential Assistance for Farmers and Fisherfolk Program (PAFFP), ilabi na sa padayon nga pagsaka sang presyo sang gatong.
Sa interview sang Bombo Radyo kay Alvin Beltran, Officer-in-Charge sang Provincial Fisheries Office, iya ginpahayag nga nagapartner ang nagkalain-lain nga ahensya sang gobyerno agud makahatag sang bulig sa mga mangingisda nga apektado sang padayon nga pagsaka sang produktong petrolyo.
Suno kay Beltran, ang amo nga program makabulig sa mga mangingisda sa makapahagan-hagan gasto sa ila pang adlaw-adlaw nga pagpangabuhi.
Nahibaluan nga may kabug-usan nga 1,075 ka mga mangunguma kag mangingisda sa nagkalain-lain nga lugar sa Capiz ang nalakip sa listahan sang mga benepisyaryo sang PAFFP sang Department of Agriculture (DA), paagi sa Bureau of Fisheries and Aquatic Resources Region 6 (DA-BFAR 6).
