Nangin malinong ang pagsaulog sang Tigkalalag sa Cagay Cemetery sa Barangay Cagay, Roxas City subong nga tuig.
Sa interview sang Bombo Radyo kay Barangay Kagawad Isidro Aragon, iya ginpahayag nga wala sang natabo nga seryoso nga insidente sa sulod kag palibot sang sementeryo sa tion sang pagbisita sang mga pumuluyo sa ila mga pinalangga nga nagtaliwan na.
Suno kay Aragon, nagbuligay ang mga opisyal sang barangay kag ang mga nagkalain-lain nga ahensya agud masiguro ang kalinong kag seguridad sang mga nagbisita sa sementeryo.
Pahayag pa sini, nagserbe man nga importante nga bahin sang pagpanghanda ang pagmonitor sa sitwasyon sa palibot sang sementeryo agud malikawan ang posible nga pagsulod sang mga problema kag mapabilin nga hapsay ang pagbisita sang publiko.
Nagpasalamat man ang natungdan sa kooperasyon sang mga pumuluyo nga nagsunod sa mga layi kag panugyan sang mga nagabantay, nga nakabulig agud mangin malinong ang pagsaulog sang Tigkalalag subong nga tuig.
