Nagtambong si Bureau of Fire Protection (BFP) Region 6 Regional Director FCSUPT Edwin P. Vargas, DSC, sa delegasyon sang BFP nga ginpangunahan sang Officer-in-Charge nga si FCSUPT Wilberto Rico Neil A. Kwan Tiu, sa Singapore-International Disaster and Emergency Management Expo (SIDEX) 2026 kag Asian Conference on Disaster Reduction (ACDR) nga ginhiwat sa Singapore halin Oktubre 28 tubtob 30, 2026.
Ang tatlo ka adlaw nga international nga pagtililipon gintambungan sang nagkalain-lain nga lider sa disaster management kag mga eksperto sa emergency response halin sa nagkalain-lain nga pungsod.
Katuyuan sang aktibidad nga magbaylohanay sang mga eksperyensya kag maayo nga pamaagi sa pagdumala sang kalamidad, magkilala sang mga bag-o nga teknolohiya, kag mapalig-on ang pagbinuligay sang nagkalain-lain nga pungsod sa pagpanghanda kag pag-atubang sa mga emerhensiya.
Ang pagtambong sang BFP Region 6 sa amu nga aktibidad nagapakita sang padayon nga panikasog sang ahensiya nga mapauswag ang ihibalo, gamiton ang mas moderno nga mga pamaagi kag mapalig-on ang kapasidad sang mga bombero sa paghatag sang epektibo nga serbisyo sa paglikaw kag pagresponde sa sunog kag iban pa nga emerhensiya sa bug-os nga Western Visayas.
