Nagturn-over ang Police Regional Office 6 (PRO6) sang tatlo ka patrol vehicles kag nagkalain-lain nga Information and Communications Technology (ICT) equipment sa pili nga police units sa Iloilo kag Capiz agud mapalig-on ang operasyon kag mapaayo ang serbisyo sang kapulisan.
Personal nga ginpangunahan ni PBGen Randulf T. Tuaño, PRO6 Regional Director, ang seremonya sang pagturn-over.
Ang mga patrol vehicle ginpanagtag sa 2nd Iloilo Provincial Mobile Force Company, Maayon Municipal Police Station kag Estancia Municipal Police Station.
Samtang, ang Zarraga Municipal Police Station nakabaton sang lima ka desktop computers kag duha ka printers, samtang ang Iloilo Police Provincial Office (IPPO) nakabaton sang tatlo ka desktop computers, isa ka printer kag isa ka projector.
Suno kay PBGen Tuaño, dako ang mabulig sang dugang nga mga salakyan kag teknolohiya sa pagpalig-on sang presensya sang kapulisan, pagpadali sang pagresponde sa mga emerhensiya kag pagpaayo sang pagdumala sang mga rekord kag komunikasyon.
Ginpahanumdom man man sini sa mga personnel nga gamiton kag atipanon sang husto ang mga kagamitan agud masiguro nga ang mga ini makahatag sang mas madasig kag masaligan nga serbisyo sa publiko.
Kabahin ini sang padayon nga panikasog sang PRO6 nga magmodernisar sang mga kagamitan kag mapalig-on ang kahanda sang kapulisan para sa mas luwas nga Western Visayas.
