Ginlunsyar sang Capiz Police Provincial Office (CPPO) ang Project IQ-PASSED nga may tinutuyo nga mapauswag ang kalidad sang serbisyo sang kapulisan, mapabakod ang ila operasyon kag mapalig-on ang disiplina sang mga police personnel.
Sa interview sang Bombo Radyo kay Police Colonel David L. Cachumbo Jr., Provincial Director sang CPPO, iya ginpahayag nga ang Project IQ-PASSED ukon Integrated and Intensified Quad Policing, Administrative Support Strategy, and Exemplary Discipline isa ka estratehiya nga sang madinalag-on nga operasyon, administrasyon kag disiplina sang kapulisan.
Suno kay Cachumbo, una nga nakabaton sang IQ-PASSED Blue Book ukon dokumento nga nagalakip sang mga giya kag estratehiya sa pagpatuman sang proyekto amo ang Roxas Component City Police Station.
Paagi sa amo nga proyekto, ginalauman sang CPPO nga mangin mas responsable kag disiplinado ang mga police personnel agud mas mapauswag ang pagserbisyo kag pagmintinar sang kalinong kag seguridad sa probinsya sang Capiz.
