Ma-ekperyensyahan ang power interruption sa pila ka lugar sa Roxas City kag probinsya sang Capiz sa Sabado kag Domingo nga adlaw Nobyembre 7 tubtob 8.
Sa interview sang Bombo Radyo kay Reagahn Alcantara, Senior Officer sang National Grid Corporation of the Philippines (NGCP), iya ginpahayag nga kabahin ini sang pagpaayo sa Roxas Substation agud mapauswag ang boltahe sang kuryente.
Suno kay Alcantara, kinahanglan ang amo nga pagpaayo bangud nagadugang ang demand ukon kinahanglanon sang kuryente sa syudad.
Sa Sabado, Nobyembre 7, natalana ang power interruption halin alas-5:00 tubtob alas-7:00 sang aga kag alas-4:00 tubtob alas-6:00 sang hapon.
Samtang sa Domingo, Nobyembre 8, magaumpisa ang power interruption alas-6:00 sang aga tubtob alas-6:00 sang hapon.
Ginapanawagan ang publiko nga magpreparar kag magtalana sang kinahanglanon antes ang nasambit nga power interruption.
