Ginahatagan sang importansya sang isa ka health expert ang pagpalapnag sang ihibalo kag kaangay nga impormasyon parte sa peligro sang paggamit sang illegal nga droga, kadungan sang selebrasyon sang Drug Abuse Prevention and Control Week.
Sa interview sang Bombo Radyo kay Dr. Faye Arciga Besana, Assistant City Health Officer, City Anti-Drug Abuse Council (CADAC) Focal Person kag Community-Based Drug Rehabilitation Program Focal Person, iya ginpahayag nga importante nga maintindihan sang publiko nga ang paggamit sang iligal nga droga indi lamang nagahatag sang malain nga epekto sa lawas, kundi nagadulot man sang seryoso nga epekto sa panghunahuna, mental health, kag kabuhi sang isa ka indibidwal.
Suno kay Besana, ang padayon nga paggamit sang droga mahimo makaapekto sa normal nga pag-obra sang utok, nga mahimo magresulta sa pagbag-o sang pamatasan, paghuyang sang memorya, kakulang sang kontrol sa kaugalingon, kag iban pa nga problema sa panglawas.
Dugang pa sini nga ang drug addiction ukon pagkaadik sa droga isa ka komplikado nga kondisyon nga nagakinahanglan sang husto nga paghangop kag pagbulig, kag indi dapat tan-awon bilang kakulang lamang sang disiplina sang isa ka tawo.
Bangud sini, importante nga malikawan ang pagpang husga ukon pagpalayo sa mga indibidwal nga nagakaeksperyensya sang problema sa paggamit sang droga, kundi hatagan sila sang oportunidad nga makabaton sang nagakaigo nga bulig kag magbag-o.
