Gintawag sang House Prosecutor kag Manila Representative Joel Chua nga tama ka “butigon” si Davao City Assessor Engr Jaime Adalin, ang una nga defense witness sa impeachment trial ni Vice President Sara Duterte sa pagpadayon sang trial.
Ini matapos nga ginkwestyon ni Chua ang pagpamalibad ni Adalin nga sabton ang mga pamangkot may kaangtanan sa iya pagbiyahe sa China sang nagligad nga Nobyembre.
Ginkwestyon man sang kongresista ang ikasarang sang witness nga hibaluon kun residential ukon commercial ang isa ka propedad nga ginpresentar sang prosekusyon apisar nga makita sa mga litrato nga ginagamit ini bilang business establishment.
Suno kay Chua, kasubong nga ginalikawan sang witness nga sabton ang pila ka mga importante nga palamangkutanon may kaangtanan sa mga alegasyon batok sa bise presidente.
Ginpanindugan sang mamalidha nga kwestyonable ang kakulang sang memorya ni Adalin tuhoy sa iya pagbiyahe sa China bangud suno sa iya indi ini isa ka kinaandan nga hitabo nga madali lang malipatan.
