JAENA, NORTE, Jamindan, Capiz – Patay ang isa ka senior citizen matapos ang pagpanglabo sa Sitio Proper, Barangay Jaena Norte, Jamindan, Capiz.
Matandaan nga natabo ang insidente November 08, sa takna sang 8:30 sa aga sa bahin sang duha ka persona.
Ang suspek ginkilala sa alyas nga Roy, 45-anyos, residente sang Barangay Mambiranan Piquino, Passi City, Iloilo, samtang ang ginkilala sakay alyas Santos 64-anyos nga residente sang nasambit nga lugar.
Sa interview sang Bombo Radyo kay Police Major Jaypee D. Silvestre, Officer-in-Charge sang Jamindan Municipal Police Station, iya ginpahayag sini nga una sa insidente, naga-inom sang makahulubog nga ilimnon ang biktima kag ang suspek sa sulod sang isa ka puluy-an.
Suno kay Silvestre, ginatan-aw nga ang daan na nga hiligutanon sa tunga sang duha amo ang posible nga motibo sa krimen. kun sa diin ang pagyaguta sang biktima sa may Persons with Disability “PWD”, nga anak sang suspek.
Pahayag pa niya, nabatian sang asawa sang biktima ang komosyon sa ila balay gani nagpauli ini halin sa pagpatubog sang karabaw, kag pag-abot sini, naabutan niya ang iya live-in partner nga madamo na sang pilas duguon sa ulo nga bahin.
Dugang pa sang witness nakita man sang asawa nga gin-utod sang suspek ang kadena nga nakahigot sa iya anak nga may PWD, agud nga makapalagyo. Samtang gindala pa sa pampubliko nga hospital ang biktima para sa nagakaigo nga pagbulong, apang sa masubo nga balita gindeklarar ini nga dead on arrival sang attending physician.
Sa karon, nahibaluan nga yara na sa kustodiya sang Jamindan MPS si alyas Roy matapos boluntaryo nga nagsurrender sa bulig sang ila Punong Barangay para sa nagakaigo nga dokumentayon kag disposisyon kag magapangatubang ini sang kaso nga Homicide.
