Padayon ang rehabilitasyon sa Santa Monica Bridge sa banwa sang Panay, Capiz, agud mapabakod ang estruktura sini kag masiguro ang kaluwasan sang mga motorista kag pumuluyo nga nagagamit sang tulay.
Sa interview sang Bombo Radyo kay Mayor Jonathan Sonny Besa sang Panay,Capiz iya ginpahayag nga importante ang ginapatigayon nga rehabilitasyon agud masiguro nga magapabilin nga mapag-on kag luwas ang nasambit nga tulay.
Suno kay Besa, kabahin sang proyekto ang structural retrofitting ukon pagpapag-on sang nagkalain-lain nga parte sang tulay, lakip na ang pagpaayo sang approach slab nga nagakonekta sa karsada kag sa bridge deck.
Tinutuyo sini nga mapauswag ang kabakod sang estruktura, malikawan ang mas daku nga pagkaguba kag mapalawig ang paggamit sang tulay.
Dugang pa sang natungdan,importante nga masiguro ang husto nga implementasyon sang rehabilitasyon kag ang pagpatuman sang nagakaigo nga safety measures agud malikawan ang aksidente samtang ginahimo ang proyekto.
