Ginkwestyon sang isa ka Food Technology graduate ang P96 nga adlaw-adlaw nga poverty threshold nga ginapatuman sang gobyerno, bangod suno sa iya, indi ini bastante agud masuportahan ang pang-adlaw-adlaw nga kinahanglanon, ilabi na ang pagkaon sang isa ka tawo.
Sa interview sang Bombo Radyo kay Mhar Magbanua, isa ka Food Technology graduate kag pumuluyo sang Roxas City, iya ginpahayag nga indi makatarungan nga makabig nga indi na imol ang isa ka tawo nga naga-kita sang sobra sa P96 kada adlaw, bangod malayo ini sa aktuwal nga balor sang mga balaklon sa merkado.
Suno kay Magbanua, indi na bastante ang amo nga kantidad agud makaigo sa tatlo ka beses nga pagkaon sa isa ka adlaw, bangod bisan ang pinakabarato nga sud-an sa karinderya yara na sa galibot sang P50.
Pahayag pa niya, bilang isa ka Food Technology graduate, indi man niya makabig nga masustansya kag balanse ang pagkaon nga masarangan baklon sa amo nga kantidad.
Limitado lamang ang pagpili sang pagkaon, nga mahimo magresulta sa pagsalig sang mga pumuluyo sa mas barato nga processed foods pareho sang de lata kag instant noodles.
Bangud sini, ginapanawagan niya ang gobyerno nga magpatuman sang mas epektibo nga mga tikang agud mapunggan ang padayon nga pagsaka sang presyo sang mga balaklon kag makontrol ang inflation rate, ilabi na agud mabuligan ang mga minimum wage earner kag mga pumuluyo nga may limitado nga kita.
