Gin-athag ni Senate impeachment court presiding officer Francis “Chiz” Escudero nga indi gidayon rason para sa contempt of court ang indi satisfactory nga sabat sang mga witness sa mga pamangkot sang mga senador-judges.
Suno kay Escudero, sa ika-43 nga adlaw sang impeachment trial, may mga kinamatarong man ang mga saksi nga dapat respetuhon suno sa Rule 132, Section 3 sang Rules on Evidence, bisan pa nga nagsumpa sila nga magsugid sang matuod kag magsabat sa mga pamangkot sa atubang sang korte.
Ginpahanumdom man ni Escudero ang iya mga kaangay nga senador-judges lakip na ang iya kaugalingon, nga kinahanglan magpakita sang pasensya kag patas nga pagdumala sang trial.
Dugang pa sini, mahimo nga pamangkuton sang maid-id ang mga witness agud ma-usisa ang kamatuoran sang ila mga pahayag, apang dapat likawan ang mga pamangkot ukon pahayag nga makapahadlok sa mga saksi sa baylo nga makabulig sa ila nga magsugid sang matuod.
Ginpunto man ni Escudero nga responsibilidad sang impeachment court nga patigayunon ang trial nga may patas nga pagtratar, dignidad kag respeto sa tanan nga partido kag mga witness.
