CAPIZ-Nagpatigayon ang Provincial Disaster Risk Reduction and Management Unit (PDRRMU) – Capiz sang tatlo ka adlaw nga Basic Incident Command System (ICS) Training para sa mga personnel sang Philippine National Police (PNP) kag Municipal Health Officers halin sa nagkalain-lain nga banwa sa probinsya sang Capiz.
Ginpahigayon ang nasambit nga training halin Nobyembre 4 tubtob 6, 2026, sa Aura Hotel sa Barangay Lawaan, Roxas City, bilang kabahin sang probinsya-wide nga programa sa pagpauswag sang kapasidad kag kahandaan sang nagkalain-lain nga ahensiya sa pag-atubang sang mga emerhensiya kag kalamidad.
Panguna nga katuyuan sang training nga mapabaskog ang ihibalo kag paghangop sang mga partisipante sa implementasyon sang Incident Command System ukon ICS, nga nagahatag sang organisado nga sistema sa pagpanguna, pagdumala kag pagkoordinar sang mga operasyon sa tion sang emerhensiya kag kalamidad.
Pinaagi sa nasambit nga programa, ginahatagan sang importansiya ang epektibo nga pagpanguna, husto nga pagbinuligay kag pagkoordinar sang nagkalain-lain nga ahensiya, episyente nga pagdumala sang mga kagamitan kag iban pa nga kinahanglanon, kag organisado nga pagpatuman sang mga aksyon sa tion sang emerhensiya.
Ginapaabot nga paagi sa sini nga pagbansay, mas mapabaskog ang kahandaan sang mga personnel sang kapulisan kag mga opisyal sa ikaayong lawas sa tagsa ka banwa, ilabi na sa pagpatuman sang husto kag madinalag-on nga emergency response operations.
Kabahin ini sang padayon nga tikang sang PDRRMU-Capiz sa pagpalapad sang kapasidad sang nagkalain-lain nga sektor kag ahensiya agud masiguro ang isa ka koordinado, organisado kag nagabinuligay nga pamaagi sa disaster preparedness kag emergency response sa bug-os nga probinsya.
Pinaagi sa prinsipyo nga “One Command, One Coordination, One Goal,” ginatinguhaan sang probinsya nga mapalig-on ang sistema sang pagresponde sa emerhensiya kag maprotektahan ang kabuhi kag seguridad sang mga pumuluyo agud mangin mas preparado kag mas mabakod sa mga kalamidad ang Capiz.
