Patay ang 14 ka mga indibidwal samtang 30 ka iban pa ang napilasan matapos nga nadalahig ang 18 ka mga salakyan kag lima ka mga truck sa makahalanusbo nga aksidente sa Emirate of Fujairah sa United Arab Emirates.
Suno sa UAE Interior Ministry, natabo ang aksidente sa entrance sang nasambit nga emirate.
Base sa preliminary information, ginapahayag nga nadulaan sang kontrol ang driver sang isa ka truck rason nga nagbunggo sa isa pa ka salakyan rason nga nadulaan man sang kontrol ang mga ini kag nakabunggo sa pila ka mga salakyan nga nakapundo bangud sa mahinay nga dalagan sang trapiko.
Nasunog ang truck kag madasig nga naglapta ang kalayo sa iban pa nga mga salakyan.
Sa 30 ka mga pilason, 15 ang nakagwa na sa ospital matapos nga ginbulong, samtang 15 naman ang nagapabilin nga naka-confine.
Ginkumpirmar sang kapulisan nga lakip sa 14 ka napatay amo ang mga Emirati nationals kag pila ka mga foreigners. Ginapatigayon naman ang DNA testing agud mahibaluan ang identity sang mga biktima.
Lakip sa mga napilasan amo ang mga pumuluyo sang UAE, Oman, India, Brazil, Pakistan, Jordan kag Egypt.
