Gin-appoint ni President Ferdinand Marcos Jr. si Commission on Audit (COA) Chairperson Gamaliel Cordoba bilang bag-o nga Supreme Court Associate Justice.
Suno sa Malacañang, si Cordoba ang magabulos kay Associate Justice Amy Lazaro-Javier nga natalana nga magretiro sa Nobyembre 16, 2026.
Samtang, wala pa sang anunsyo ang Presidente kon sin-o ang magabulos kay Cordoba bilang lider sang COA.
Ginpahayag ni Palace Press Officer Undersecretary Claire Castro nga nakita sang Presidente ang ikasarang kag potensyal sang mga opisyal, gani sila ang ginasaylo sa iban nga posisyon kun sa diin mas magamit ang ila talento.
Ginhatagan man pagtamod ni Castro nga wala nagakahulugan nga nadulaan na sang pagsalig ang Presidente sa isa ka opisyal sa tion nga masaylo ini sa iban nga ahensya sang gobyerno.
Sa tion sang pagpungko ni Cordoba bilang COA chairperson, ang ahensya nagsumite sang indi magnubo sa 50 ka fraud audit reports sa Office of the Ombudsman kag sa Independent Commission for Infrastructure.
Ginpatuman man niya ang paggamit sang GPS-based geotagging sa mga proyekto sang imprastraktura sang gobyerno sa bug-os nga pungsod agud masiguro ang nagakaigo nga pag-verify sang ila estado.
