Pilipinas, nagaplano nga magmungkahi sang pagtipig sang pagkaon kag humay bilang preparasyon sa El Niño
Nagaplano ang Pilipinas nga magmungkahi sang pagtukod sang isa ka rehiyonal nga sistema para sa pagtipig sang pagkaon kag humay bilang preparasyon sa posible nga mga krisis sa Southeast Asia, lakip na ang mabaskog kag malawig nga El Niño.
Sa karon, nagkasugtanay na ang mga pungsod nga miyembro sang Association of Southeast Asian Nations (ASEAN) nga palig-unon ang ila kooperasyon sa sektor sang agrikultura. Lakip diri ang pagbinayloay sang kaalam kag teknolohiya nga ginagamit sa pagpanguma.
Bisan wala pa pormal nga natalakay ang panukala nga pagtipig sang pagkaon, ginpasalig ni Trade Secretary Cristina Roque nga panikasugan niya nga ipresentar ini nga plano sa iban nga mga pungsod nga miyembro sang ASEAN.
Gindugang pa sang kalihim nga makabulig ang mga kasugtanan sa tunga sang mga pungsod sang ASEAN agud mapabilin nga bastante ang suplay sang pagkaon sa rehiyon kag malikawan ang hinali nga pagsaka sang presyo sang mga panguna nga balaklon.
Samtang, suno sa isa ka pagtuon, lakip sa mga lugar nga may posibilidad nga maigo sang mabaskog nga pag-ulan ang katimugan nga bahin sang Pilipinas, Brunei kag Singapore. Posible man nga maapektuhan ang pila ka lugar sa Thailand, Cambodia kag Vietnam.
Nakita man sa pagtuon nga ang tagtuyot nga dulot sang El Niño sa tion sang pagtanom mahimo nga magpapanubo sang ani sang humay, ilabi na sa mga uma nga nagasalig sa ulan. Natabo na ini sang nagligad sa Pilipinas kag sa Mekong River Delta sa Vietnam.
Bangud sini, ang pag-antala sa produksyon sang agrikultura mahimo man magresulta sa pagsaka sang presyo sang pagkaon, labi na sa mga pungsod nga nagasalig sa imported nga suplay sang pagkaon.











